_________________________________________________________________________

Oproop

Al lang liggt mi dat an’n Harten, dat de Kinner tohoop singen köönt. Denn so veel Goods kummt dorbi tostann: Gemeenschop, Frünnschop, Glück, dat Geföhl een höört dorto, de Kinner warrt tofreden un sünd övereen. Bald 40 Johren bün ik ‘n Schoolmeester för Musik ween un ik heff bi’t Singen faken beleevt, dat so wat passeren deit.  Jümmer maakt mi dat bliede.

Togliek is dat düütlich to sehn: In de globaal Welt vun’t Inter-Nett hebbt de Kinner dat heel swoor, dat se dat to weten kriegen, wat de Minschen ut ehr Naverschop un se övereen hebbt. Fröher do versteiht sik dat vun sülms, dat wöör de Spraak. Un nu dücht mi, dat is ‘n gode Gedank, sik op de nedderdüütsche Spraak to besinn’n, dat Plattdüütsch.

Hüüttodaags kann keeneen dat Hochdüütsch or Englisch  mehr utwesseln. Man een Saak maakt Plattdüütsch jümmer noch möglich: Platt kann de Kinner mit anner Generatschonen in de Ümgegend verbinnen. Wenn de Kinner weet, dat se ‘n besünnere Spraak ut de Gegend kennen, denn maakt se dat stolt und seker. Ok wenn dat Kind man blots dree Wöör seggen kann, dat meent dat höört dor to.

Plattdüütsch warrt nich mehr de Spraak vun‘n Alldag ween, man Platt is, wat de Kultuur angeiht, ’n Deel vun usen Traditioon un Identität. Un de gode Sieden dorvun, de will ik bewohren un wiedergeven. Un dat kannst‘e nich beter moken, as wenn de Kinner op Platt singen un Theater speelen doot.

Üm dat stell ik mi för, ik will:

·         ole, överlevert plattdüütsch Leder dörkieken, hoochdüütsch un englisch Leder översetten, un ok ne’e Lede rutbringen.

·         Lüüd, de an’e Scholen arbeiden or de ‘n Choor vörstahn bi’t „Singen op Platt“ hölpen.

·         in de Scholen plattdüütsch „Sing-mit-mi“ Kunzerten afholen.

·         ‘n plattdüütsch Kinner-Choor grünn’n.

·         Musikspelen för Kinner in’t Platt överdregen.

·         ‘n Speeldeel för Kinner opboen.

·         ne’e plattdüütsch Leder online publik moken.

·         vör all Lüüd Kunzerten mit plattdüütsch Leders afholen.

·         u.a.m.

Dat is to veel to doon för een Minsch alleen un todem bün ik ok neeschierig, wat anner Lüüd dorto för Gedanken hebbt.

Den Vereen „KINNER  SINGT  OP  PLATT“, den mag ik hier in Gang setten.

Denn tohoop, dor geiht allns beter.

Intresseerst du di för so’n Arbeit un kannst du di vörstellen so’n Vereen totohören, denn mellt di ünner david.s.baer@web.de , dat ik di dat wiesen kann, wo de Vereen grünnt warrn schall.

Syke, 08.11.2022

David Bär

P.S. Kennst du anner, de sik villicht ok interesseern doon, denn dank ik di, wenn du jüm düsse Oproop wiederleitst.  :-)